Kiltti yksinpuhelu Armon kintereillä

Kuuestoista luku, Kiltteydestä kipeä, Juhani Päivärinta

___

Josset sie ossaa asettaa ittelesti rajoja,
et ossaa kunnioittaa toisenkhaan rajoja,
kävelet oman ja toisen elämän yli ja ohi.

Jos olet neutri, et ota kantaa asioihin,
sullei ole ommaa mielipiettä,
et ole kukhan ees ittelesti.

Rajaton neutri on ihminen, jokei ole kotona,
ovet lukossa, ikkunat tukossa ja piipun päälä hattu,
ja sielä syvälä syämmessä itkee ja kaipaa.

Rajaton neutri on tyytymätön ja kiukkunen,
tuskanen ja niin hukassa,
on vain ikävän ja kaipuun tuoma hätä ja tuska.

Rajaton ussein mielistellee joitaki
ja jokku toiset eijjole hälle mithän,
rajaton loukkaa ja kolhii itteä ja toisia.

Hattutemppuja kannattaa varoa,
alkaa pikkuhiljaa ja rauhassa harjotella
rajoja ensin ittele ja sitte vasta joskus toisile.

Kannan ottaminen vaatii vastuunottamista,
mielipitheensä kauhniisti sanominen on hyvä tapa 
harjotella jonaki olemista.

Elämä, son muuten jumalallinen taphaus,
mystinen keikka jostaki ikkuisuuesta,
lyhyt ja niin ihana keissi, ei kannata ohittaa.

Elämä on armolahja 
ja Tähtelän Olavin sanoin:
Jumaloi elämääsi, älä menetelmääsi ellää.

Eilen mulle soitti yks viisas ja rakas ihminen,
ja puhuima, kuinka meilon tänä aikana
kaikkia keinoja ellää onnellista hyvvää elämää.

Rauhotu, ei mithän hättää ja pikkuvihje:
pane valot pääle ja piä mieli kirkhaana,
kehu itteästi ja kiitä kaikkia, son rakkautta.

Rakhauella hilkkapien