Juhannuksen hengget

Juhannuksen hengget

On vihreää ja vehmasta
niinko syreenipensasta
maistas ja haistas
ja kaikkon niin kauhnoista
ja ihanaista.

On juhannuskoijjut,
soreat ja koreat
ja silitetty tuuki
pöyälä ja porsliinikupit
teefatin kans,
siittäki sen tietää,
etton kesä ja juhannus.

Entäsnet rapajälet
laattioilako läpinrootanat
tömhäyttäny laukkoa
märin jaloin uimasta
sisäle syöhmään.

Juhannuskukat kukkii
ja mettän käet kukkuu
ja jos saama hönttästä
tätä elämää etheempäin,
tullee uusia
kuvituksia ja huvituksia
ja saama elämänkirjoja
plarata,
loittuja lukea,
taikoja tekeä,
plummia kerätä,
juhannustansseja
valssata ja rokata,
sulhot ja morsmaikut
pokata ja plokata

Aurinko paistaa,
taivas antaa kaistaa,
maa horisonttia maistaa,
taijjat ittehään toistaa,
lummous kiiretta laistaa,
saama suven hellyyessä kelliä
ja keitellä juustovelliä.

Niin kaunista on kaikki,
on vain ilma ja henggitys
ja henkien kantehleet.

Kirjotan kirjaa #älänujerru
https://www.laronia.com #saajakaa