Oiskhanse rakhautta se

Oiskhanse rakhautta se

Semmonenko myöntäs itte ittele
ittensä erehtyväiseksi,
näkis ittensä keskeneräseksi,
nöyrtys omhiin mittoihinsa
mithän ittestä poisottamatta
tai itheensä päälleliimaamatta,
suostus vastuulliseksi
aikuseksi ihmiseksi
semmosenako just nyt on.

Sanos ittetuntosesti
omana ittehnään,
kuvia kumartelematta,
selittelemättä,
lupia kyselemättä,
misthään piittaamatta,
tuo eijjoo minun kuplassa totta,
tuota en halua tehä,
tuota en ota, en anna,
en ala enkä halua.

Nousis ja menis sinne,
minnesse oma elämä vie,
kulkis harhhaan,
tupsahtas takasin polule,
sekkoilis ja pallais järkhiinsä.

Kunnioittas syvästi itteä,
luottas täyesti itteensä,
myöntys omhan elähmään,
suostus niinko johatukseen.
Semmostahanse rakhaus, meipii.

Kirjotan kirjaa #älänujerru
https://www.laronia.com #saajakaa

Joulun jäljillä

Nyt joulun kellot jo kilisi
ja joulule tie silisi,
ko joulupuu parvekheele kiisi
eikäsolepoka ko yks joulupiisi,
ko meilon joulu
ja loppuu läpiltä koulu.

Pyyhimä naamat
ja ämmit ja paapat
vunukoita näkkee
ja muutaki väkkee
ja yksinäisellekki joulu tullee,
son semmonen taphaus,
ei ohita kethän.

Joulukalenteri oottaa
ja siinähän on monta lunkkaa,
net ensin hääymä avata
ja tonttua monta tavata,
sittesse vasta tullee joulu.

Kirjotan kirjaa #älänujerru
https://www.laronia.com #saajakaa

Nimpparionnet ja synttäriponnet

Pirkko, Mari ja mie
ja monet muut hymysuut,
tänhhän ja huomena
tai joku muu päivä
viettää juhlapäivää.

Nimethän voi vaihtaa,
mutta sitä emmä saa kaihtaa,
että ooma jokhainen
ainutlaatunen ihkanainen
ja joka päivä on
juhlapäiväkö son elämänpäivä,
ainutkertanen ja uniikki,
koskhaan takasinpallaamaton,
ooh, kuinka huima ajatus,
älä silti pyörry.

Kirjotan kirjaa #älänujerru
https://www.laronia.com #saajakaa

Ottasko vai ei

Pari askelta tyhjän pääle,
pikkuspurtti tuntemattohmaan,
laukkos summamutikassa
pari päivää tummassa erämaassa,
ylös outoja kiviojia,
yö ikivanhassa puussa,
alas liukhaita polkuja,
ei tukiasemia,
ei turvallisuusasetuksia,
ei kävelykeppajä,
ei kainalosauvvoja,
ei lakhaita kaveleita,
ei pokaleita luvassa
eikä ässiä hihassa,
hä, kuka uskaltas kokheilla.

Kuasson omantienkulkija,
hihassa merkki ja ottassa tähti,
ja omile teile se lähti.
No sepä ei päälleppäin näy,
kuka uskaltaa ottaa
tai olla ottamatta.

Saattaapi olla tuo
naapurin uus ihana froua,
ooh, sekhänson, oukei rakhaat,
sakheiksi käy aatokset
ja saarnaajan paatokset,
miltei yltiöpäisiks,
mahtipontisiks ihan
ympäri maan
ja halkipoikki pihan
ja läpi viikonlopun, hih.

Kirjotan kirjaa #älänujerru
https://www.laronia.com #saajakaa

Siihen ei auta piipaa-auto

Loistava mielikuvitus
ja auts, mitä rikhaampi,
sitä enämpi se teettää
ja sitä enämpi pittää
kysyä, mistä tiät,
ooks varma,
onkosse varmasti totta.

Rakastava ja rakentava
onniinkö vanha koijju,
hyät juuret,
kokoa ja näköä,
levittää lehvistönsä,
muttei disinffoa lain,
pyssyy tottuuessa ain.

Eikä sitä voi ylittää,
eikä sitä voi alittaa,
eikä sitä voi kiertää,
mutta sen voi kaataa,
kuivata ja polttaa
ja se muuntuu ja uuistuu
ja piipaat huutaa uu-uu
ja jokhainen itte päättää,
ja rajansa säätää,
mitä uskoo ja mitä ei
ja piipaat huutaa uu-uu.

Kirjotan kirjaa #älänujerru
https://www.laronia.com #saajakaa

Hallintaongelmia

Aikuset toisia aikusia
pakottaa, pakko, pakko,
pakko, pittää pakottaa
ja tököttää.

Ihmiset henkensä kaupala
luonu ja tuonu ja kannattanu
sanan- ja mielen vaphautta.

Valtiot allekirjottanu
ihmisoikeuet ja taanu
ruumiillisen ja henkisen
koskemattomuuen.

Oi ihmiset toistanne
rakastakkaa,
jokhaihminen on arvokas
ja tekkee koko ajan parhhaansa.

Kenen ongelma sonko
toinen aikunen valittee toisin.
Mihin met oiken aikaa hukkaama
ja omia elämän hetkiä käytämä.

Kirjotan kirjaa #älänujerru
https://www.laronia.com #saajakaa

Huithapeli

Lorvailee ja lusmuilee,
ostaa himphamppua
eikä silloo lamppua,
koikkaa umpimähkään
eikä osu lätkään.

Voi olla auttavaisin,
syämmellisin ja ilosin
ihminen koko kylälä,
sitä pitäs kiittää kypälä.

Meän kuiva ja tylsä fiksuus,
tärkeily ja teeskentely
tarttee alentuvvaa kattomista,
huithapeleitten nauramista.

Ko tässä aattelen,
tullee olo, että nytton aika
varmasti nauraakki,
josson viishaita on typeriäki,
josson kovvaa on pehmeääki,
puspus ja hymynaama.

Kirjotan kirjaa #älänujerru
https://www.laronia.com #saajakaa